PA LE FAPA LE THIANG THLARAU HI PERSON PATHUM AN RAK SI HRIMRHIM KO

PA LE FAPA LE THIANG THLARAU HI PERSON PATHUM AN RAK SI HRIMRHIM KO

• Pathian cu khuaruahhar Pathian a si bantukin van ruat ve than ko hmanh u sih law, Jesuh cu Pathian Bia a si tiah ( Biathlam 19 : 13 ) nakah a ti caah le Bible zong nih Bia cu Pathian sinah a um i cu Bia cu Pathian a si a ti. ( Johan 1 : 1 – 2 ). Cun Cathiang nih, “Pathian sinak kha a ngeih zungzalmi a si ko nain hramhram in Pathian tluk si awk kha cuh awkah a rel lo. Amah lungtho te tu in cu vialte cu a hlawt dih i sal sinak tu kha aa lak; Minung bantuk ah a cang i minung mui in a lang; Mi toiah aa dor i nawlngaihnak lam kha thih tiangin a zulh, vailam cung thihnak kha,” tiah a ti. ( Filipi 2 : 6 – 8 )..

• Cun Jesuh vawlei a um lioah hin Pathian a si tiah Bible nih a ti bak loh. A timi cu, “Zeitintiah amah ah cun taksa in Pathian sining tling cu khua a sa,” a ti ( Kolose 2 : 9 ). Cucu Jesuh nih, “Hi cancan nan sinah ka um nain maw atu tiang nan ka hngalh rih lo, Filip? Keimah a ka hmumi nih cun Pa zong a hmuh ko, zeitindah ‘Pa cu kan hmuhsak’ na ti khawh? Pa chungah ka um i Pa zong keimah chungah a um ti hi nan zum lo maw? Nan sinah bia ka chimmi hna hi keimah nawl in ka chim lo; ka chungah a ummi Pa riantuannak a si. Keimah hi Pa chungah cun ka um i Pa zong ka chungah a um ti hi zum ko u. Asiloah, rian ka tuanmi hna thawng tal hin ka zum u,” tiah a rak chimh kha a tlinnak a si. ( Johan 14 : 9 – 11 ). A fiang chinchinnak dingah cun, “Asinain atu caan hmanung bik caan ah hin cun a Fapa in kan sinah a chim. Amah cu zeizong vialte rocotu ah a chiah i vawlei zong hi amah thawng cun a sermi a si,” a ti. ( Hebru 1 : 2 )..

• Jesuh cu thihnak in Pathian nih Lianngannak pum in a thawhter hnu ah khan van ah a kai. Cathiang nih zeitin a kan cawnpiak, “Kan biaknak phung chung i aa thupmi biathli hi zeitluk in dah a ngan ti kha ahohmanh nih an al kho lo: Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai. ( 1Timote 3 : 16 ). Cun a rihmi cu, “Ahodah a kan hlaw ti lai? Jesuh Khrih nih maw? Kan ca i a thih lawng hmanh si loin thihnak in a tho than i Pathian orhlei ah thu in a kan nawlpiaktu dahkaw a si,” a ti. ( Rom 8 : 34 ). Cun, “Ka dawtmi ka fale tete hna, hi thil kong ah ca kan kuat hna hi nan sual lo nakhnga caah a si; sihmanhsehlaw mi zeimaw nih a sual a si ahcun kan Pa sinah tanpitu a dingmi Jesuh Khrih kan ngei,” a ti. Amah cu kan sual ngaihthiamnak ca i thawinak a si, kanmah ca lawngah si loin vawlei pumpi sualnak ca zongah a si fawn.” ( 1Johan 2 : 1 – 2 )..

• Cuhnuah, “Ahohmanh nih Pathian cu an hmu bal lo; sihmanhsehlaw Pathian Fapa bel nih Pathian cu mi kha a hngalhter hna. Cu Fapa cu Pathian Fapa ngeihchun, a Pa tang chung i aa pommi kha a si,” a ti. ( Johan 1 : 18 ). Cun Jesuh hrimrhim nih khan vawlei a um lioah a Pa sinah a halmi cu, “Cucaah Ka Pa, vawlei ser hlan i nangmah sin i ka rak ngeihmi sunparnak kha, atu ah hin na hmaika ah sunparnak ka pe tuah,” tiah a hal. ( Johan 17 : 5 ). Cu Jesuh nih a Pa sinah a halmi cu, “Pathian orhlei kamah khan thutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si.” ( Lamkaltu 2 : 33 ). Zeicatiah Jesuh cu pumsa hrimrhim in van ah a kaimi a si kan ti cang ko hna mu. ( 1Timote 3 : 16 )..

Khah zoh hmanh u sih law,

( 1 ) Johan 4 : 24
– Pathian cu Thlarau a si..

• Pathian nih hin, “Minung le sarnak hi a kut in a sermi kan si. A Bia in a ser hna loh. Cucaahcun Pathian hi Thlarau pum a si ti cu a fiang..

* Genesis 2 : 7/ 19
– Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung..

– Cucaah vawlei khan saram an dihlak le va an dihlak kha a ser hna i mipa sinah cun an min rak sak awkah a ratpi hna. Mipa nih min a rak sakmi hna kha an min ah a cang lan.

( 2 ) Johan 1 : 14
– Cu Bia cu thisa ah a cang i kan lakah khua a sa..

• Fapa Jesuh cu taksa in minung a si. Cucu tampi tial hau loin kan hnglah ko i Jesuh van a kai tiangah hin pumsa a si tiah Bible ah kan hmuh fawn ko..

* 1Timote 3 : 16
– Kan biaknak phung chung i aa thupmi biathli hi zeitluk in dah a ngan ti kha ahohmanh nih an al kho lo: Minung pum in a lang i ahmaan tiah Thlarau nih tehte a khaan, Vancungmi zong nih an hmuh. Miphun kip sinah a kong cu chim a si, Vawlei cung khuazakip ah mi nih an zumh i vancung ah a kai..

( 3 ) Lamkaltu 2 : 33
– A Pa nih bia a kam bantuk khan Thiang Thlarau cu a Pa sin khan a hmuh..

• Thiang Thlarau hi Khrih nih Pathian sinak a kaltakmi le Pathian sinah a hal thanmi le a Pa nih bia a kam bantukin Thiang Thlarua cu a Pa sinin a hmuh tiah tiah Bible nih a kan cawnpiak mi a si. Zeicatiah Cathiang chungah kan hmuhmi cu, “Fa nan si caah Pathian nih a Fapa Thlarau cu kan lungthin chungah a run thlah i, “Abba, Kapa,” tiah a au,” a ti ( Galiti 4 : 6 ). Cucaahcun Thiang Thlarua hi Khrih nih a rak ngeihmi le a Pa sinin a hmuh thanmi kha a si ti cu a fiang tuk lawlaw hi a si. Cucaahcun dawh Cathiang chungah , “Peter nih anih cu a rak thawh i, “Ananias, zeicahdah Satan cu na lung kha na ukter i na lo man in na hmuhmi tangka a cheu kha naa chiah i Thiang Thlarau sinah lih na chim?” tiah a rak ti cuh. ( Lamkaltu 5 : 3 )..

• Cucaahcun Pa le Fapa le Thiang Thlarau hi person pathum hrimrhim an si ko. Taksa pum in Fapa Jesuh a si. Thlarau pum in Pa le Thiang Thlarua hi an si. Bible in tial len a hau ah ka ruat ti lo. A sau fawn cang i mu. Cun Thiang Thlarau kongah hin zumh ning le chim ning aa dang cio ko lai. Dr. Pakhat he phone chawn lio ah bia ka rak halmi chungin a ka letmi bia ka uar ngaimi cu, “BIBLE HI RELNAK SAWHSAWH IN HIN THLARAU THIL KONG CU FIAN KHAWH DIH SISEH LAW BIBLE SINGIN KAI LE PASTOR TUAN HI A HAU HNA HME MAW?,” tiah amah tu nih bia hal bantukin a rak ka leh. Khua tampi a rak ka tuahter. Cun bia tampi a ka chimh hnuah peh rihmi cu, “NA ZUMH LE ZUMH LO KHA CU NANGMAH CUNGAH A UMMI A SI KEIMAH CHIMHNAK THAWNIN NA FIAN SI LOIN PATHIAN NIH FIANNAK HRIMRHRIM KHA IN PE SEH,” tiah a ka ti. Ka lawm taktak khi si. Amah zong Bawipa Pathian nih damnak le hlawhtlinnak thlachuah pe seh law Amah thawngtha Biatak phuangtu dingah hmang chinchin ko seh. Cun Pathian ka khuaruah a harnak pakhat chim ka duhmi cu, “Amah kan zumh khawhnak dingah lung thlennak a kan petu zong amah Pathian thiamthiam,” hi a si..

Thank you,
Johnly Fambawl

Be the first to comment

Leave a Reply

Your email address will not be published.


*