Sejong University Ah Song Hye Kyo He Caan Khat Lio

Sejong University Ah Song Hye Kyo He Caan Khat Lio

Kei hi Mizoram Aizawl khuapi ah khua a sa deuh mi le sianginn a kai deuh mi ka si. Ca thiam zong ka si lo nain ca kai zuamnak ruang ah ka result a tha zungzal. Aizawl ah sianginn cu ka kai lengmang ko i India ram Assam state Silong ah sianginn kai than ding in timhtuahnak ka ngei.

Silong khuapi ahcun Technological University ah Bechalor of Engineering ka dih hnu ah ramdang ah sianginn kai peh țhan ding in timhtuahnak ka ngei. Silong kan sianginn siangngakchia chung in a thiambik mi minung 5 an kan thimmi chung ah kai tel kho ve. Mah cu minung 5 cu ram dang ah sianginn kai ding in timhtuah piak kan si. India ram cu ram tha a si tikah ramdang i sianginn kan kainak ding ah a dih dingmi tangka 70% cu cozah fimthiamnak zung nih bawmh a si i 30% te lawng hi kanmah nih i rin ding a si.

Kan syakyi pa nih khoika ram sianginn kai dah na duh bik tiah a ka hal. Khoika ram sianginn le university dah a țha hnga tiah caansau pi kai ruat ve. Online in khoika sianginn dah a tha hnga timi ka kawl i an cawnmi kong le sining vialte ka hlathlai dih ve. Ka mark hmuh mi le thiammi he ai tluk in sianginn kainak kawl ka hau ve. Vawlei cung sianginn thatha, USA le UK, Singapore le Australia ram i University sianginn thatha hna khi ka mitthlam ah an cuang tawn.

Cuticun za khuadei thinlung ba ngai in khua ka ruat. Cozah nih a kan bawmhmi pinlei ahhin teh ka chung le nih an ka bawmh kho hnga maw ti ka ruah ah sianginn kainak man ai dennak zong cu kawl a hau.

Cutin khua ka ruah lio ahcun ka thinlung a ba ngaingai cang. Thinlung damnak caah tiin Korea film tlawmpal te zoh ta ning ka ti Korea film cu ka hun zoh ta. Cu ka zoh mi fiml ah lemcang ( Fidi ) a țuanmi cu Song Hye Kyo hi a si. Mahhi fiml cu kan khua zong ah ka rak zoh zungzal i nungak nu ka rak uar tukmi te kha a si. Mahhi nu hi film tampi aa thla mi a si i a rak lar taktak mi kha a si.

Mahhi muidawh nu ka hun hmuh bak in ka thinlung le nunnak ah lungretheih thabatnak vialte an lo dih, thinlung lawmhnak in ka khat. Cu tlawmpal ahcun Song Hye Kyo timi konglam cu online ah ka kawl i ka hlat colh.

Cu lio hrawng cu Song Hye Kyo cu Sejong University ah Master of Business Administration a kai lio ti kha ka theih. Zeitindah si hnga mahhi Sejong University ah sianginn kai hi ka duh ve ko ee, a si kho hnga maw tiah ka ruat. Ka cawn dingmi le ka kai dingmi a um hnga maw ti kha ka hlathlai colh.

Kan syakyi pa kha ka chimh i kan pahnih in kan i zuam hnu ah cuka sianginn kai ding cun cohlan ka si.

Sejong University phak lai le Song Hye Kyo mui hmuh lai cu kai ngaih taktak. Zan zong kai hngilh ti lo. Cu kong lawng te cu ka mitthlam in ka suai i ka ruat zungzal.

Ni le thla din lo tein a kalmi chung ah Korea ram kal ding ni caan cu a hung phan. Ka thil te cu kai ken i New Delhi International Airport cu ka phan cang. Korea ram cu ka voikhat kalnak ding a si caah ka zenh ngaingai. Hmanhseh kal lo awk a that lo caah kal kai thawh. Vanlong nihcun cung ah a hun kan cawi i vanlai Mupi bang South Korea ram panh cu kan zuang thluahmah. Caan sau ngai kan zuan hnu ah khin South Korea ram cu kan phan. Ka tlunnak ding Hotel lei ah Taxi ka suai i inn ka phan.

A zan cu Hotel ah hngilh kho loin zankhua ka dei. A ruang cu Song Hye Kyo sianginn a kainak University ka phan cang lai va si kaw Song Hye Kyo he tonnak caan tha ka hmu kho hnga maw ti lawng ka ruah ah ka thin a tur cia cang.

Cutincun zinglei khua a hung dei i sianginn lei cu ka panh. Ka umnak le sianginn hi ai neih te caah Taxi in minute 10 lawng kal a si. Bus a service mi zong a um nain ka thei rih lo. Sejong University pi cu ai dawh hringhran ko. Cu lio caan cu khuasik tuk lio can a si tikah snow tete an tla ngai. Sianginn pawng ka hun phak cun ka thin hi khuangtum bak in ai tun i a tur ko. Sejong University pi cu a huham a rak ngan tuk ning le mipi a kan hip tuk ning hi a mak ko.

Cuticun Sianginn cu kai hram kan hun thawk hna. Sejong University ahcun Businees of Management lei cu ka cawng ka kai. Cuticun sianginn ca zong ruat lem loin Song Hye Kyo thawngpang lawng cu a thli tein ka hlat lengmang ko. Sianginn kaimi hi mah le cawnmi cio dihlak fonh in siangngakchia hi minung 16,000 hrawng kan si. Kan tam taktak khi a si ko.

Minung 16,000 hrawng lak ah minung pakhat Song Hye Kyo kawl cu a fawi lo. Capawl lak in țhimfang kawl bantuk kha a si.

Cutincun thla 3 chung hrawng sianginn ka kai ve cang i anmah Korea mi theih hngalh hawikom tete zong ka ngei ve cang. Ka hawi le sinah cun Actress Song Hye Kyo kha hmuhton ka duh ko ee tiah ka chimh tawn hna. Ka hawipa pakhat nih Song Hye Kyo a Instagram account a ka chimh i ca ka kuat.

Kei cu Myanmar mi India lei in a rami ka si. Movie nai thlaknak ah kan hmuh lengmang i zaangfaknak tein ton le hmuh kan duh ko ee tiah ca ka kuat. Aw a si ko kan i tong te lai cu tiah a ka leh ve. Mah tluk in muidawh le hlasakthiam a si ko nain uah nak le i tisannak a pel te hmanh a ngeih lo zia ka theih tikah ka khuaruahhar pah.

Korea nungak cu muidawh tamtuk hna kaw nungak muidawh deuh ka hmuh mi hna poh hi Song Hye Kyo hlah maw a si tiah ka ruah dih hna. Cu tluk cun ka mit le ka thinlung nihhin Song Hye Kyo cu a kawlmi le a hlammi a si.

Hi lio caan ahhin Song Hye Kyo cu kum 26 a si cang i kei cu kum 23 te lawng ka si rih. Ka nakin kum 3 a upa deuh. A nih cu Master of Business Administration a cawn lio a si.

Siangin campus cu a kauh tuk caah thuttonak le lamlennak tibantuk tete zong a tha i a nuam ngai. Thinkung thladem tang te ah thuttonak thutdan an donh mi tete a um i cuka cun nungak tlangval aa duhdawtmi hna cu duhdawtnak biazai an phai țheo tawn.

Muidawh Song Hye Kyo he tonnak caanțha kan i tiammi ni caan cu ruah lo piin a hung tling. A phone number cu ka hun call i sianginn campus ( tual chung ) chung ah kan i kawl cang. Sianginn hnu lei kil zawn ah khin Chery kung pakhat a um i cuka kungtang ahcun thutdan an chiahmi pakhat a um. Cu hmun ahcun van ra a ka ti caah cu ka lei panh cu a kal. Ka kal pah ahhin ka thintur tuknak ah zeiti ka kal zong hi kai thei lo.

Cuka hmun cu ka va phan i Song Hye Kyo cu a bag te he siangin uniform hruk in a rak thu ko. Lam hla nawn khin ka hei bik i a pawng ah tlangval an um sual hnga maw ti ka ngia pah. Minung a ho hmanh an um lo caah ralțha ngai le hnangam ngai in ka va kal. A hmun cu ka phan i ” Nangmah hi Song Hye Kyo cu na si maw?” tiah thintur ngai in ka hun hal. ” Aw si ko ee, nang tah mah cu na si ve maw?” tiah nih bu te khin a hun chawnh ve.

Ka voikhatnak Korea Actress lak i ai dawh ti vemi ka hmuh si caah kai lunghmuih bak ve. A mui ka hmuh cun ka chim lai ka timi bia vialte zeimawzat ka philh hna. Cutincun bia cu kan ruah. Snow a tlami tete nih kan lu le kan Angki hrawng tete a hun thlak pah ve. A kik ngaingai. Kan thaw kan chuah ah a khu mi tete khi a chuak. Lai lei ngakchia upa ti loin a movie kan zoh i kan hei uar tuk ning le, Mizo holh hna in an leh ning pawl ka hun chimh tikah ai lawm taktak ve. A caan ahcuh a nichuah tuk caan zong a um. Cuticun suimilam pakhat chung hrawng bia kan i ruah cang. Hmailei ah hawikom theih-hngalh tha veve si dingin Diary cauk chung ah kan umnak South Korea a umnak address le Kawlram ka umnak address pawl tial piak i a tang ah minthutnak tuah kan ti tim.

Ka Diary cauk te cu ka hun chuah i Song Hye Kyo nih a kutput Pen bak in a unnak leihsa tial ding kha a hung si. A kut le ka Diary cauk ai rem tuk ning hi a mak teh. A hun tial in “Actress Song Hye Kyo,….. tiah a hun tial vial ah khin ka phone a hung ring i kai țhang. Hello!!! Zeitin ka van ti. Ka dua tu tiang na tho rih lo maw? Tho cang, tho cang, boss pa nih Bus stop in a kan hngak ko tiah ka hawi pa nih a hun ka chawnh. Ka mit ka van i hnuai i hmawcamang nawn in ka hmai kai phiah hnu ah Bus stop lei ahcun ka kal. Malaysia ram ngai hi zeitluk mangtha manh lio le mitku thawt lio zong ah rian ah kal a hau tawn. Hmmmmmm.. Riantuan ka kal pah le ka tuan chung vialte Park Shin-hye cu ka mitthlam ah a cuang i chun nithlak ka ruat.

News nih an simh pah suak hna ah tiin rel nuam sawhsawh

Andrew Tum Tling