Cozah a tuanvo ngan bik ‘mipi ca rian thar ser’

Cozah a tuanvo ngan bik ‘mipi ca rian thar ser’
===================================
–Ram le miphun a thancho khawhnak ding caah rammi riantuan cio a hau, phaisa income an ngei cio a hau. Cuti income an ngeihnak ding ah cozah nih mipi caah ‘rian thar’ ser ding hi cozah a riansang bik pakhat a si.

Tulio Chin NLD cozah i a chambau biknak zong rianthar ser lei ah a si, rian thar an ser khawhmi a tlawm i ser ding zong an ruat lem lo timi kan hmuh khawh.

–Chin party CNLD lei zong an interview zoh tikah rianthar ser(job creation) an i timhnak voikhat tal an chimmi ka hmu bal lo, ‘Kawl party’ an tinak lawngte ka hmuh zungzal ve.

A sifakmi kan miphun hi zeitindah sifahnak in kan luatter lai timi an chimrel zong ka thei bal lo, policy le strategy an ngeimi zong ka thei bal lo.

–Nain, kei cu ka miphun caah zeitindah rianthar ka ser lai timi ka ruat zungzal, 2015 in tuni tiang ah ramchung ramleng minung 100 leng rian ka pek kho cang hna. An dihlak in Chinmi lawngte an si.

–Lairam ah cozah tender/project a um tikah riantuantu 90% hrawng cu Kawlmi an si cang tiin ka theih. Ka lungtha lo ngai. Laimi cu an tuan huam cio lo, aruang cu hlawh a niam tuk ruang ah a si an ti. Tender tlaitu company cu tam ngai an miak fawn.

Hika zawn ah cun Chin cozah nih tender bawhmi company caah zulhphung zong a ser awk a si, ‘riantuantu hlawh sang deuh a pe khomi le riantuantu lakah Chinmi 70% tal a telh khomi company lawng tender pek a si lai’ tibantuk in hma lak ding a si.

–Hiti ka chim tikah Kawlmi ka thleidan hna a si lo, kanmah kan covo kilven a hau ka ti duhnak a si. Kawlmi caah cun Kawlrawn ah company tampi a um i rian tampi a um ko. Lairam ah cun company a tlawm, rian a har tuk. Cozah nih lam kip in ser a haumi a si.

Kei MP ka tlin ahcun MP power in tampi thlennak tuahnak nawl ka ngei lai lo, tender kong zong ah biachahnak nawl ka ngei lai lo, nain cozah vuanci le CM sin ah a herh zat in chimrel le ruahnak pek khawh ka zuam lai.

Pumpak dirhmun in rianthar tampi ka ser cang bang, MP dirhmun ka phak ahcun tam deuh ka ser khawh lai ka zumh, khuate lei tiang mino caah rianthar tampi ser ka zuam lai.

Salai Lung Thli Tum

Be the first to comment

Leave a Reply

Your email address will not be published.


*