JESUH I A ZUMHNAK DIRHMUN

JESUH I A ZUMHNAK DIRHMUN
Theological Position of Jesus of Nazareth

1. BAIBAL CATHIANG (BIBLIOLOGY)

Jesuh nih Baibal bia cu ai rawk kho lomi a si a ti (Johan 10: 35). Cathiang chung bia ningin a tuahtu le a cawnpiak mi cu vancung pennak ah mi lianngan an si lai a ti (Matt. 5: 19). Zultu hna a cohlang mi cu Keimah a ka cohlangmi an si a ti (Matt. 10: 40). Zultu hna bia a cohlang mi zong Khrih bia a cohlangmi an si tinak a si cu. Cucaah Jesuh nihcun Baibal thiang cu biakam hlun siseh biakam thar siseh a rawkkholomi ah a chiah. Luke le a dang pawl nih an ttialmi zong cathiang ah a chiah tinak a si.

2. PATHIAN (THEOLOGY PROPER)

Jesuh cu thumkomh Pathian pakhat a zummi a si. Pa Pathian kha Ka Pa! Ka Pa a ti lengmang pah, Keimah le Ka Pa cu pakhat kan si a ti pah. Ka Pa kha zum u law, keimah zong kha ka zum uh a ti (John 14: 1-2). Jesuh lawng a zum i Pa a zumlomi kan ram ah kan tam ngaingai. Cun, Thiang Thlarau kha tingco uh a ti hna. Keimah nan ka tinco hi Thiang Thlarau nan tinco asi ko a ti hna lo. Khrih an zumh hleiah Thiang Thlarau tinco kha a fial hna (John 16).

3. SUALNAK (HAMARTIOLOGY)

Adam sualnak kan i hrawmnak hi Jesuh nih a pom. Cucaah Jesuh nih nan nih cun nan pa khawchia fa nan si, rul fale nan si tiah a ti (Matt. 14: 8).

4. MINUNG (ANTROPOLOGY)

Jesuh nih minung nih taksa le thlarau kan ngeih i a phuan ve. Kan taksa cu a thih tikah thlan ah vui in a um, kan thlarau tucu zumtu kan si ahcun Abraham ttaang (paradise) ah a kal a ti. Zullotu kan si ahcun sheol, mithi khua ah a kal a ti (Luke 16). Jesuh nihhin mithla hi a zum lo. Minung kan thih hnu ah kan thlarau a vaak i mi a tthih hna tihi a zum lo. Lazaruh cu a thi i a thla a vaak a ti lo. Abraham ttaaang ah a kal a ti. Mirum pa zong a thi ve i a thla a vaak a ti lo. Hell ah a kal a ti. Cucaah mithla a um timi hi Jesuh nih a pom lo. Laimi zumhnak he ai ralchan. Zultu hna nih Jesuh kha mithla ah an rel i Jesuh nih mithla ka si lo. Mithla nih titsa le ruh a ngeih ttung lo tiah kan Lai Baibal i nan hmuhmi kha cu an i leh palhmi a si. Thlarau ah an rel tiin Mingrang le Greek ahcun ai ttial. Vanmi zong thlarau, khawchia zong tlarau, minung thlarau zong thlarau a si. Mithla ti theng a si lo. Mithla timi biafang hrimhrim Baibal ah a um lo. An i lehpalhmi Baibal lawngah a um.

5. KHAMHNAK (SOTERIOLOGY)

Jesuh nihcun hrintthan lawnglawng ah vancung kai khawh a si a ti (Johan 3: 3). Hrintthan a um lo a ti mi pawl zumhnak he cun ai ralchan bak. Cun, Jesuh nih khamhnak a tlau tthan kho ti lo timi cawnpiaknak hi a zumh. Hrinttanmi hna cu hell ah an tla tthan kho ti lo ti kha a zumh. Fapa a zum mi cu zungzal nunnak a ngei a ti. Fapa cu kan zumh i atu ah kan ngei cang. An sual tthan ahcun hell ah an tla tthan lai a ti ti lo. Bia ngaite kan chimh hna kan bia a thei i a ka thlahtu a zummi cu zungzal nunnak an ngei, sual biaceihnak chung in an luat. Thihnak in nunnak ah an lan cang a ti. An sual ahcun an thi tthan lai a ti ti lo. Nunnak ah an lan cang a ti (Johan 5: 24). Cucaah Jesuh nih khamh tlau a pom lo.

6. KHRIHFABU (ECCLESIOLOGY)

Jesuh cu thla a cam ah dididididdiddededede ceiceiceiceiceicei ti i thlacam a hmangmi a si lo. Haleluiah, Amen, Haleluiah, Amen, Haleluiah, Amen, Haleluiah, Amen, Haleluiah, Amen, Haleluiah, Amen, Haleluiah, Amen ti i thlacam a hmangmi zong a si lo. Halleluiah ti i voi 7 aupi a hmang mi zong a si lo. Capo chim a hmang lo. Biatak lawngte a chim. A chimmi kha a mah nih a zulh fawn. Hlim le laam hi a uar lo. Laam fawrhfial a hmang lo. Amah zong hi a laam bal lo. A zultu hna zonghi an laam bal lo. Laam hi revival tlak ah a chia lo. Asinain dawtnak in a khat.

7. THLARAU THIANG (PNEUMATOLOGY)

Thlarau Thiang hi takpum ngeimi a si ti a fian ter. Thlarau Thiang nih an cawnpiak hna lai, lam an huai hna lai, fim an chimh hna lai tiah a ti tu a si (John 16). Laimi nih kan uar ngaingaimi holhtheihlo kong he pehtlaiin Jesuh nih holhtheihlo kong a chimmi pakhat hmanh a um lo. Jesuh nih holhtheihlo hi a theih pimi a si lo. Mark 16: 16 -18 i kan Lai Baibal i a zum i tipil a ing mi cu khamh an si lai. Holhtheihlo in an holh lai a timi khi cu Lai Baibal i an i leh palhmi a si. Jesuh chimmi a si lo. “New Tongues” titu a si i “holh thar” tinak tu a si. Holhtheihlo ti a si lo. Jesuh zumtu cu holh thar a simi Jesuh dawtnak kong an chim lai tinak a si. Holhtheihlo cu Jesuh nih a theihmi le a chimmi ah ai tel loh.

8. HMAILEI CAAN (ESCHATOLOGY)

Jesuh nih kum 7 harnak hlan i thiang lawr nak kong a chim (Matt. 24). Cucaah Jesuh cu keimah zumhnak bantukin pretribulational rapture view a zum mi a si. Cun kum 7 harnak kong a chim. (Matt. 24). Cun kum 7 harnak a dih hnu ah vawlei i a rat tthannak kong a zummi, premillenium second coming of Christ view a zummi a si. Jesuh nih taksa pum thawh tthannak, biacheihnak le hell a um taktak nak kong fiangtein a kan chimh Matt. 13, 24-26).