kei cu Pu Tial Ling le Dr Aye Aye Ngun an thim hna khi an thiam tuk ka ti(Salai LTT)

Hakha NLD nih Hakha peng NLD candidate caah Pu Tial Ling, Dr Aye Aye Ngun, Pu Zo Bawi, Pu Sui Thio le Pu Ngun Vung an thim hna. Hi kong ah mipi lungtlin lonak cu a um ko lai, nain kei cu Pu Tial Ling le Dr Aye Aye Ngun an thim hna khi an thiam tuk ka ti.

Pu Tial Ling hi Yangon khuasa bal Laimi nih a thei lomi kan um lai lo, cozah riansangpi tiang a tuan i Yangon ah Laimi nih bochan taktakmi kan pa bik pakhat a si. Laimi kan pale lakah MP ai tlak bak, Lairam caah miphun dawtnak lungthin he rian a tuan kho bak ding tiah keimah nih cun ka hmuh.

Dr Aye Aye Ngun cu Laimi lakah fimcawnnak lei in arfi bantuk kan ngeihmi a si ve. Hakha College ah principal a tuan hmasa bik a si. Chinram ah fimcawnnak lei kan thancho a herh ning fiang tein a hngalh. MP a tlin ahcun Chinram caah fimcawnnak lei thlennak tampi a kalpi kho ding a si.

Pu Zo Bawi le Pu Sui Thio cu kum 5 chung rian a tuan ciami an si, thim than awk an tlak le tlak lo cu mipi nih cuai an thlai ko hnga. Chin party CNLD nih candidate tha bakmi an thlah hnawh hna ahcun anmah pahnih cu an sung kho tiah ka ruah. Mipi nih party maw mee an pek lai or minung dah timi cung zong ah tampi ai hngat te lai.

Sipin chairman Pu Ngun Vung cu a konglam tampi ka thei lo, nain Hakha hmunhma samhnak kong ah a dirhmun cu ka uar ngai. Hakha Khuathar ah cun a lar men lai lo, nain hmundang ah cun an tanpi ngai ko lai ka zumh.

Tutan NLD candidate ah Senthang mipi nih an chuahpimi minung an i tel lo caah Senthang peng mee cu tam nawn an sung kho. Nain, zeirian hmanh a tuan kho lo ding Chin party MP thimnak cha cun tlawmpal tal a tuan kho ding NLD minung thim a duh deuhmi khuate an tampi ve lai.

Salai Lung Thli Tum

Be the first to comment

Leave a Reply

Your email address will not be published.


*