Zeiruangah thil man nan tial chih lo?(By Aidii Collections)

Zeiruangah thil man nan tial chih lo?

===============================

 

Aidii kan riantuannak ah mi tampi nih akan hal mi bia asi. Ciamman te in leh a ahauh caah caan lak deuh in ka hun tial lai. Kan mah caah cun pakhat ciocio page message in a man leh nak in thil man tial chih in tar hi rian hna a thiang tuk pin ah afawi deuh tuk ve ko. Asinain ma tin kan tuah khawh lo nak aruang tampi an rak um i mah lak ah a biapi ngai mi a ruang (3) in ka rak langhter lai.

#1nk cu a fiang ngai ko. Kan thil hi Kawlram le Ramdang a man an ilo hna lo. Ramdang cu nan theih bang in shipping fees tuak chih a hauh tik ah thil a zun a tam le a tlawm in a man aa dan pin ah ram khat le ramkhat zong a man aa lo kho lo.

#2nk ah thil hi tampi kan chuah khawh lo caah a tu lio cu a man hi kan fix khawh rih lo mi zong an tam ngai rih. Bianabia ah ready to wear pawl hi vawikhat chuah ah tam deuh in kan chuah khawh cun cost (thil chuah ding ah a dih ding) a tlawm deuh lai i a man zong a tu nak in a tlawm deuh te lai. A tu cu design test cuahmah lio, production le logistic lei ah covid-19 ruang he kawlram a si ruang he, phaisa (investment) kan ngeih lo ruang he ti in tlamtlin lo nak tete a tam caah tampi kan chuah kho rih lo.

#3nk ah kan thil copy a tuah tu pawl nih hin kan thil man an icawn caah asi.

Mah ka zawn ah hin caan lak deuh in hun hrilhfianh ta ka duh ko. Kan nih thil cu kut-tah bak te an si i thil zun tampi kan chuah kho lo ti cu kan chim lengmang cang ko caah a fiang ngai cang ko lai. Thiamsin tah pawl cu chikhat ah zun tampi a chuak kho. Kuttah le thiamsin zeitluk in aa dan tiah nan ruah khawh ding ah tlawmpal chim ta ka duh. Thawi a tling mi hnitial/kor/puan oneset ah hin kut tah in thla 3 a rauh lio ah thiamsin in cun zarh 2, zarh 3, atambik thla khat ah aa lim kho. Thiamsin cu thawitenh kha minung pahnih in ibawmh khawh a si i pahnih nih an tah cun zarhkhat hmanh in aa lim kho. Thawitenh lo hni/puan/kor (a tu post he ka tar mi hmanthlak bantuk) ni 14 hrawng kan tah lio ah thiamsin in cun ni 3 lawng tah asi.

Ma ti’n a caan pek mi aa dan tuk caah Cost (thil zunkhat a chuak ding caah a dih mi) aa dang tuk ve. Asi nain pricing (thilzuar man) tuak tik ah thiamsin tak hna cu a sining te in aman khiah lo in kan mah kut-tah thil man zoh in aman an ikhiah. Kan mahnak in a man a tlawm deuh cun a za tiah an ti i a ningcang lo in thil man an hauh tawn. Rian pakhat caah confidencial information (aleng mi theih ter lo ding) pawl a si nain chim a herh cang ko tiah ka ruah caah tlamtling deuh in ka hun chim lai.

Abianabia ah 2014 Aidii kan thawk ka ah Hnitial thawitenh lo design (mah post ah hmanthlak tar mi) pawl in kan rak chuah. Mah lio ah kawlram chung Aidii thilman kan hauh mi cu onest ah 80,000 Kyats a rak si. Tah man kan pek mi hi oneset ah 35,000 – 40,000 a rak si. Tahman pin ah La man le adangdang thil a chuahnak ding ah a dih mi kan tuak chih tik ah cun thil zunkhat ah 80,000 kan hauh mi kha a miak a um lo tluk in asi.

Arauh hlan ah thiamsin copy arak chuak i oneset zunkhat ah 60,000 in an rak zuar hmasa. A rak icawk mi nih nan hngalh bik ko lai. Mah lio caan ah Kalay i thiamsin tah man cu oneset ah 5,000 – 7,000 hrawng lawng arak si. Tuak ko u law cost a za te a dih ding ah zunkhat ah ahleihluak in tuak hmanh ah 20,000 pin a si kho lo i, 60,000 in an zuar mi cu profit margin (amiak) zeizah dah an lak? Cu pin ah an nih cu la kha voikhat lak ah tampi in an lak khawh caah kan mah nak in man fawi deuh in an cawk khawh rih lai cu mu.

Mahnak in a fian deuh ding ah a tu 2020 ah cun mah 60,000 in an rak zuar mi design thiamthiam kha thiamsin tah thil pawl cu 15,000-25,000 hrawng in an zuar cang. Thil sining tuak ah cun la man hi 2014 nak in 2020 ah a kai deuh. Asinain thil man ah 60,000 in 25,000 tiang zeiruang ah dah a man an thumh khawh? Mah khan cun thiamsin tah pawl i a miak an lak ning a fiang ngaingai ko lai. (Thawitenh lo design kha a man fawi bik a si caah bianabia ah ka lak).

Ziah mahtluk cun aman an hauh khawh kun? Afiang tuk mi cu kan design kha mipi nih nan kan cohlan ruang ah asi ko. Asinain design a chuahtu Aidii i kuttah thil pawl cu a man fak tuk tiah nan ruah ruang ah kan mah nak in a let in quality aa dang ko nain a man aa dang tuk lo mi (kannak in tlawmte a fawi deuh mi) thiamsin tah pawl tu kha nan fuhpanh deuh mi cu asi.

Kan mah Aidii thiamrun zong tukum chung cun thiamsin in thil chuah ding kan itimh cuahmah lio asi. Covid-19 nih a kan khen ruang ah kan tlamtlinh kho rih lo. Thiamsin thil kan chuah khawh hlan ah kan thil pawl copy tamtuk a chuah mi hi kan mah nih kan chuah khawh lo caah asi ko ti in kan rak ruah peng ko. Asinain a cung i ka chim bantuk in kan design kha mipi nih na kan cohlan caah a sining pinlei in aman ah amiak an in hauh mi te kha ka lung ah a ka doh pah mi cu asi. Ka chim duhnak na kan theihthiam piak lai tiah kai ruahchan.

Mah ruang cun kan thil man kan tial paoh ah hin copy nih khan kan thilman tluk te in an ihauh lengmang caah khan aman kan tial chih khawh tawn lo mi kha asi.

Zeiruang ah thil man nan tial chih lo? Ti mi biahalnak hi rian tuan kan thawk ka te in nihin tiang hal kan tong lengmang. Biahalnak tuah hi a fawi tuk ko nain leh ding ah a cung i thilsining vialte kha zohchunh/tahchunh in chim ding ah kum 6 tiang a caan kan pek a herh.

A dang biahalnak, ruahnak cheuhnak pawl fiang te in kan in leh khawh rih lo mi hna tampi a um rih. Kan lung ah kan ichiah peng ko. Aidii cu chikhat ca ah kan tuan mi rian a si lo caah lungsau thinfual te in na kan hngah ve nak lai upatnak he kan in nawl hna.

– Anna Biak Tha Mawi @ Aidii
Photo: Ko Htun Lin
2014

Aidii Collections

Be the first to comment

Leave a Reply

Your email address will not be published.


*