Republican Party Vs Democratic Party [ Conservative Vs Liberal ]

US President thimnak lawng mi tam deuh nih kan hngalh I zeibantuk party le zeibantuk policy an ngeih timi cu a theimi kan tlawm men lai. US president cu vawleicung ah huham ngei bikmi a si caah an riantuanmi le an pawlasi nih ramdang zong a hnursuan tawn caah US President thim thar mi nih zeitindah ram an hruai lai? zei policy dah a ngei? zeitindah ramdang le kan ram ah impact a tuah khawh timi hi hngalh phu le theih phu hrimhrim a si. Tutan US President thimnak ah hodah teinak a co lai? Republican party in Donald Trump nih maw a si ko lai asiloah Democratic party in Joe Biden nih dah a tei lai?. Senate le house of representative hodah teinak a co lai.

Main stream media tam deuh nih Donald Trump an doh, mifim le cathiam sang a timi cheukhat zong nih an doh, Republican party hruaitu cheukhat hna nih zong an doh. Hispanic le minak pawl nih faakpi in an doh thiamthiam. Hollywood fidi le fitlaw hna zong nih an doh. Asinain 2016 thimnak ah Donald Trump nih teinak a co thiamthiam. Democratic party le President Obama nih kum 8 chung liberal thluak in US an hruainak le mino tampi an thluak an tawlnak policy vialte cu Tutan ah Donald Trump nih teinak a co than ahcun a khupthal a leh dih lai tiah zumh a si.

US Ramkhel Party
**************
US ah Federal level in ram a hruaitu khotu party pahnih an um. Conservative ruahnak a pommi, Republican party le Liberal ruahnak a pommi, Democratic party party an si. US president an thimmi, minung 45 chungah Republican party nih President voi 19 an ngah. Democratic Paty nih President voi 15 an ngah ve. Democratic-Republican timi party nih President voi 4, Whip Party nih voi 4, National Union party nih voi 1 le Federalist party nih voi 1 veve an ngah. Party ngei lo, “Nonpartisan} nih voi hnih President an ngah bal ve.

Republican party in President a tuanmi hna lak ah minthang bik hna cu, Abraham Lincoln, Theodore Roosevelt, Dwight D. Eisenhower, Ronald Reagan, George W, Bush le Donald Trump hna an si. Democratic party chung in President minthang mi hna cu, Woodrow Wilson, Franklin D. Roosevelt, John F. Kennedy, Bill Clinton le Barack Obama an si.
Republican party cu cozah kha budget tlawm deuh pek I, cozah hmetter a duhmi an si. Cozah nih phaisa tlawmte hman I, cozah a si lomi, institute, agency pawl le private sector pawl kha thazaang pek le thawnter a duhmi party an si. Mipi kha mah le kecung ah dirter le thawnter a duhmi party a si. Democratic party cu cozah nganter, cozah nih phaisa tampi tlaih i, anmah nih zeizong te rawlrel Ie hman, mipi kha free deuh in bawmhchanh a duhmi party an si.

Republican party cu mirang, Khrihfa le mirum tam deuh nih an ttanhmi party a si. Democratic party cu Minak, Muslim, Hispanic, Latino, Asia le mi sifak tam deuh nih an ttanhmi party a si ve.

Republican Party [ GOP ]
********************
Republican party cu Grand Old paty [ GOP ] ti zongah auhmi a si. A luan ciami kum 162 lio, March 20, 1854 ah an rak dirhmi party a si. Republican party cu sal luatnak a duhmi hna nih an rak dirhmi party a si I, Abraham Lincoln Party ti zongah an auhmi a si. Republican party cu US ram a rak dirhtu hna nih khrihfa hna zumhning, hram an rak thlakmi le conservative ruahnak in ram hruai a duhmi an si caah Conservative party ti zongah an auhmi a si.

Free market capitalism an pom, free enterprise zong an pom, rampi humhimnak ah ralkap thazaang thawnter a duh zungzal mi an si. Social Issue ah conservative policies a pommi a si. Nau hrawh, nau thlak a pom lomi an si. Nule nu pale pa thitumhnak [ Same Sex Marriage] zong a pom lomi party an si. Muittawn suaithiam, Thomas Nast nih Republican paty symbol caah vui [ Elephant ] a rak suai piak hna . A sullam cu “ Strong and dignified” tinak a si.

Democratic party
***************
Democratic paty cu a luan ciami kum 188 lio, kum 1828 ah rak dirhmi party a si. President Thomas Jefferson and James Madison’s nih an rak dirhmi party, Democratic-Republican Party ro a cotu zong an si. Sal zuatnak phung a dirkamhtu party an rak si. Chan tiluan dawi a duhmi, thlen a duhmi, zei poah a tluang in a hmu khomi, biaknak ngei lomi mi a dirkamhtu an si. Khrihfa mi hna zumhning le pomning he aa ralchanh in rian an tuan caan a tam caah liberal party ti zongah auhmi a si. Democratic President Andrew Jackson cu a mindin ah “Jackass” tiah an rak auh, mah ruangah Democratic party nih an symbol ah Donkey an hmannak a si. Democratic party nih Donkey timi sullam an ngeihter mi cu “smart and brave” tinak a si tiah an langhter.

Cozah Ngunkhuai [ Tax Policy ]
*************************
Democratic siseh, Republican party siseh, ngunkhuai pek hi thazaang an pek veve. Asinain zeitindah ngunkhuai kan laak lai timi ah an ruahnak aa dang. Democratic party nih cun mi sifak, thlahlawh tlawmmi kha tlawm deuh in ngunkhuai laak I, mirum deuh poah kha ngunkhuai tam deuh in laak an duh hna.

Republican party nih cun thla hlawh a ngeimi, phaisa luhnak a ngeimi poahpoah ngunkhuai laak an duh. Aho poah phaisa an hmuhmi chung in zatuak % a tluk cio in ngunkhuai pekter an duh hna. President Donald Trump nih Amerian I business a tuahmi poah nih an miakmi chung in ngunkhuai 15% nak tam pek a hau ti lai lo’ tiah a ti.

Social Issues
**********
Zatlang nunphung kongah Republican party le Democratic party cu an ruahnak van le vawlei in a dang. Republican party nih cun thit-umhnak [ Same Sex Marriage ] timi cu nu le pa ca lawngah a si ding a si. Nu le nu, pa le pa thit-umhnak le sual tuahnak poahpoah an pom lo. Nau thlak, nau hrawh zong an pom lo. Cucaah Pro Life ti zongah an ti hna.

Democratic party nih cun Nu le nu, pa le pa thit-umhnak le sualnak zong an pom. Nau thlak, nau hrawh zong a poi ah an chia lo, cucaah “Pro Choice” tiah an ti ve. Democratic nih hin meithal hi ri khiah in ngeihter an duh hna. Tha tein background check hnu ah a nunning a thianghlim mi lawng meithal tlaihnak nawl le cawknak nawl pek an duh hna. Asinain Republican nih cun meithal tlaih cu mah le mah I vennak le himnak caah hmanmi a si caah meithal itlaih le ngeih an duh.

Supreme Court
************
Supreme court cu US biaceihnak sang bik a ngeitu an si. Supreme Court ah biaceihtu minung 9 um a si. Supreme court nih upadi kongah biachahnak an tuah cangmi cu President zong nih hnon khawhnak nawl a ngei lo. Anmah Supreme court lawng nih hnon than khawhnak reverse tuahnak nawl an ngei. Asiloah congress nih constitution amendment tuah hnu lawng ah hnon khawh le remh khawh a si.
Supreme Court I, thutdan pek cangmi cu chan chung ca a si caah hmailei kum 30 in kum 40 tiang a hmun dingmi a si. President Obama chan ah Conservative biaceihtu, Antonin Scalia a thi I, a zaka ah midang thim ding a si nain Senate ah Republican pawl majority an si caah an kham khawh I, atu tiang thim thai loin an um. Conservative Judge a Antonin Scalia zaka a lawngmi thutdan cu 2016 thimnak ah teitu a comi President Donald nih Conservative, khrihfa hna zumhnak a dirpitu, Neil Gorsuch cu a thim I, Senate nih fawi tein an fehter.

Supreme Court I conservative biaceihtu, Anthony Kennedy cu pension an laak caah a zaka ah President nih Brett Kavanaugh nih a thim I, democrats nih a sualnak a phunphun an kawl I, an soisei nain a sualnak an hmuh lo caah senate nih an fehter thiamthaim. Anthony Kennedy hi conservative a si nain a dirhmun a thlen lengmang caah zumh awk tlak a si lo. Supreme court ah Liberal pawl nih Same Sex Marriage an cohlan khawhnak kha Anthony Kennedy nih Liberal Judge lei ah thimfung a thlak caah, 5-4 in an rak fehter mi a si.

Liberal biaceihtu vialte lak ah a ruh bik tiah ruahmi Ruth Bader Ginsburg cu cancer zawtnak in a thih caah President Donald Trump nih Amy Coney Barrett cu nominate a tuah. Democrats liberal pawl nih a phunphun in kham an I zuam nain Senate ah Republican senator an tam deuh caah 52-48 in an fehter. Cucaah Supreme court ah Conservative biaceihtu minung 6 le Liberal biaceihtu 3 an si. Hi hnu kum 20 in kum 30 chung caah cun zumtu khrihfa hna caah kan himnak a dirkamhtu ding an si. Supreme court cu President nak in phunghrampi kongah a buaimi, upadi le phungteng kongah a buaibai mi vialte a donghnak bia a chattu an si.
US constitution cu a thuk, a kau tukmi a si caah an duhning poah in federal court le supreme court nih an thui an zaam I, an duhning poah in definition an tuah tawn caah President a chuakmi hna nih a duhmi policy kal khawhnak caah le a rianhma a kal khawhnak caah a zumh bikmi Judge cu a thim tawn hna.

Tutan US President thimnak hi President thutdan lawng si loin kum 30 in kum 40 tiang a hmun dingmi Supreme court ah conservative judge maw, liberal judge dah a thu lai timi hi a biapi tukmi a si. Kum 80 chung a simi Stephen Breyer cu kum 82 a si cang caah President Donald Trump nih teinak a co than ahcun a term chungah hin Supreme court ah minung pa 4 tiang an thim khawh lai tiah zumh a si.
Supreme court ah hin Pathian a hngalmi, Pathian a ttihmi, Pathian a bochanmi, khrihfa kan zumhnak a dirkamhtu conservative maw a si lai maw? asiloah Pathian a hngal lomi, Pathian a tih lomi, khrihfa hna a dirkamh lomi Liberal pawl a dirpi tu judge dah an chiah lai timi hi US President thimnak ah US um Laimi zong nih biatak tein kan I buapi mi a si ve. US ah hin zumtu le zum lotu hna biaceih zung an phak tik ah zum lotu liberal biaceih bawi hna nih zumtu pawl sungh a pek tawn hna caah khrihfa hna nih kan zalonnak a hnursuan tiah an zumh.

Chawlehnak le Riantuantu Hna [Labor and Free Trade ]
*******************************************
Republican nih thil man a kai lonak dingah minimum wage timi, thla hlawh kaiter thazaang an pe lo. Thil zuartu le thil cawtu hna karlak ah lungtlinnak nih riantuantu le rian tampi a chuahpi lai tiah an zumh. Phaisa inflation timi man ngei lo tiang in a chuak sual lai ti an phan caah rengh an duh. Democratic party nih cun thla hlawh karter an duh. Riantuantu hna hlawh kaiter lawngah American mi nih thil tampi an cawk khawh lai I, sipuazi a tha lai tiah an ruah. Democratic nih chawleh chawhrawlnak ah phung in kilh I, riantuantu hna ven an duh.
Asinain Republican party nih cun temtawntu um loin zalong tein chawleh chawhrawlnak tuah kha thazang an pek. Mah lawngah thil man a tum lai I, chawleh chawhrawlnak a thangcho lai I, business tuahtu hna zong nih zalong tein an tuah ahcun sipuazi a tha lai tiah an zumh.

Democratic party nih mirum pawl le campany nganpi pi hna cu ngunkhuai tam deuh laak an duh hna caah US company le sehzung tampi ramdang I an I thial tawn caah rian tampi cu ramdang ah an chuak an zaam. Donald Trump nih ramdang ah a chuak cangmi company pawl US an kir khawhnak dingah ngunkhuai tlawm deuh in a tthumh caah ramdang ah a chuak cangmi company cheukhat cu US ah an kir than caah sipuazi a tha I rian ngei zong an tam ti a si. Apple, GM le Ford le company tampi US ah an rak kir than.

Ngamdamnak le Izohkhehnak [Health Care ]
***********************************
Democratic party nih ngamdamnak lei ahcun cozah tawlrelnak tangah um seh ti an duh. Mah ruangah Obama nih Affordable Care Act timi phung a rak tuah I, health insurance a ngei lomi minung tampi an ngei kho lai tiah an zumh. Asinain Republican nih cun Affordable Care Act cu an duh lo. Cozah nih a herh lo tiang in a thlak ding a si lo, mah ruangah health insurance a kaiter hlei ah insurance a hmangtu hna caah quality a ngei lomi ah a chuah tiah an zumh. President Trump nih Obamacare hi thah a duh pengmi a si. President Trump nih teinak a co than ahcun Affordable Care Act timi Obamacare hi Supreme court I a phanh than ahcun an tha khawh men cang lai tiah zumh a si.

Social Welfare Programs
*******************
Democratic party nih social welfare program a simi, rian ngei lomi, food stamps pek haumi, Medicaid pek a herhmi vialte cu cozah nih tawlrel an duh. Ngunkhuai pekmi zong mah ah hin tam deuh in hman an duh. Republican party zong nih zatlang zohkhehnak program hi an duh ve nain phaisa tlawn deuh in hman an duh. Cozah tawlrelnak si loin private sector pawl tawlrel in bawmhnak tuah hi an duh deuhmi a si.

Foreign Policy
************
Ramdang pehtlaihnak ah Republican cu Democratic nak in thazang a chuah deuhmi party an si. Republican party cu ramdang buaibainak kongah a herh ahcun ralkap thazang hman in tuk a duhmi an si. Asinain Democratic party nih cun rihkhiahmi chung lawng in ralkap thazang hman an duh. Ralkap thazang thawnter thazang an pe lo. Ramdang I zatlak puicimhnak le kokek harnak bawmhnak ahcun an ruahnak a khatmi an si.

Donald Trump nih Obama nih Iran he nuclear deal an rak tuahmi cu ka hrawh lai tiah election campaign lio a chim. Obama nih Iran he nuclear deal tuahnak caah cash in US$ 500 million an pek hna pin ah US $ billion 100 in 200 kar lak hi Iran nih a co dingmi a si lai tiah zumh a si. Iran cu vawleicung muslim ralhrang phaisa le hriamnam tam bik a bawmtu an si. Donald Trump nih teinak a co tlawmpal ah Iran nuclear deal an tuahmi cu a hrawh taktak I Iran cu sipuazi in sanction zong a tuah taktak.

US nih NATO ah kum khat ah US$ Billion 650 a thawhmi le a liam mi kongah NATO chungtel vialte nih an thawhvo tha tein an thawh a hau, an thawh lo ahcun bawmhnak kan thumh lai tiah Donald Trump nih a chim. A chim bantuk in a tuah caah atu ahcun NATO chungtel hna nih an thawhvo tha tein an thawh cang ti a si. North Korea ral vennak caah US nih Japah le South Korea ram caah kum khat ah US$ billion 866 renglo kan hmanmi zong anmah nih an thawh ve a hau, an thawh duh lo ahcun bawmhnak kan thumh lai, a herh ahcun anmah tein nuclear hriamnam I ser in an I ven a hau tiah President thim tharmi Donald Trump nih a chim. Atu ahcun South Korea le Japan zongnih hlan nakin phaisa tam deuh an thawh ve cang.
Obama chan ah Israel le US pehtlainak hi a chia bik caan a phan. Donald Trump nih election campaign lio ah bia a kamhmi hna cu US embassy cu Tel Avic in Jerusalem ah ka thial lai ti a si. Jerusalem khua cu Palestine le Israel hna nih chan tampi chung an I cuhmi khualipi a si. A chim bantuk in Jerusalem khua cu Israel khualipi ah a cohlan pin ah US embassy zong Tel Avic in Jerusalem ah a thial taktak.

Donald Trump nih muslim ralhrang ISIS pawl cu an ci kan hmih dih hna lai tiah 2016 lio election campaign ah a chim. A chim bantuk in a tuah taktak I, ISIS an hruaitu Abu Bakr al-Baghdadi cu Afghanistan ram ah an vat hah taktak.

Energy Issues and the Environment
****************************
Democratic paty nih vawleitang thil chuak, sui, ngun, lungvar le meiti cu tinsih tein cawh le hman an duh. Thing le ram humhimnak biatak tein kilven an duh. Republican party nih cun vawleitang thil chuak tam deuh in laak I, a cawtu hna kha deng tein zuarh an duh hna. Obama chan ah cawh dingah an hnon lengmang mi Atlantic rili kam I, meiti le gas cawh I, Keystone pipe line US ram chungah luhpi dingmi project cu Donald Trump nih kan tuah lai a ti I a chimning bantuk in kum 4 chungah atuah taktak. Mah project an tuah khawh caah US nih kum khat ah 100 billion tluk a hmuh khawh ti a si. Atu ahcun vawleicung ah gas le zinan tam bik a chuahtu ram a si cang.

Immigration Policy
****************
Democtatic party nih cun a rawk tuk cangmi, “broken immigration system,” kha a remh in remh lawlaw an duh. US ah phung ning loin a lutmi minung 12 million tluk kha US citizenship ngah khawhnak dingah lam kawl an duh. Refugees tam deuh laak I, anmah thimfung petu ding in citizen zong tam deuh pek an duh hna.

Republican nih cun ramri vialte faakpi in rengh le kham I, phungning loin a lutmi kham an duh, Phungning tein US ah visa in luhter I, ngunkhuai zong pekter an duh hna. US le Mexican ramri in Si-ai tha lo, bing le rithaisi tampi a lut, misual, mi tha lo gang tampi zong an luh. US ram ah a chuakmi crime tam deuh cu Mexico lei in a lutmi nih an chuahpi mi a si. Cucaah Donald Trump nih US rampi a himnak dingah Mexico ramri ah fencing a tuah I, meng 200 tluk a chon cang. US ah phungning loin a lutmi sualnak a tuahmi minung 2 million renglo cu an ram ah kuat than a zuam. President Obama nih amah nawl in Immigration kongah nawl a chuahmi executive order cu a diklak ti awk in a hrawh.

Obama nih President executive order hmang in 2014 kum ah phung ning loin US ah a lutmi minung 4 million cu an ram ah kuat lo ding in order a chuah I, riantuan khawhnak work permit a rak pek hna. Asinain President Trump nih DACA timi kum tling lo pawl lawnglawng US ah caan karlak umnak nawl a chap piak ve hna.

Biafunnak
********
President Obama nih kum 8 chung US a hruainak policy tam deuh cu President, Donald Trump nih kum 4 chungah a khupthal tampi a leh. Policy thar in an kan hruai. Vawleicung ram tampi cu Republican President thar policy nih tampi a hnursuan hna. Thatnak tampi a um lai bantuk in chiatnak zong a um khomi a si. President cu kum 4 in kum 8 ah an I thleng lengmang lai nain Democratic party le Republican party hna nih an pomning, an tlaihtleng le an policy cu tampi a thleng lai lo.

Salai Lairamthang

Be the first to comment

Leave a Reply

Your email address will not be published.


*