Sualpalhnak kongah si lo in, Khuate nih Virus an Buaipi Ruangah, Rampumpi Huapin 9 points in Biden nih Trump a Lawnh

Sualpalhnak kongah si lo in, Khuate nih Virus an Buaipi Ruangah, Rampumpi Huapin 9 points in Biden nih Trump a Lawnh
======================================================================================

US rampumpi i vote a pe ding, tiin an zumhmi vialte lakin Biden nih Trump hi 9 point tluk tam in a lawnh. “Law and order” tiin Trump nih tlang ai tarmi cu khuate pawl nih a cohlan an i harh caah, a tu bantukin thil a si hi a si, tiah Reuters/Ipsos poll nih a langhter.

Sep. 11-15 karlak i opinion poll an khawmhsuatmi cu Wednesdah an an thanh i, Biden vote pe dingin ai timmi hi 50% an si i, Trump vote pek ai timmi hi 41% an si. 3% nih hin cun third party candidate hi vote pek an timh i, a dang a tangmi hi cu lung an thlek kho rih lo mi an si.

American voters tamdeuh hi cu aho deuh hi dah president ah kan thim ah a that lai, timi kongah i laklawh in an um hna. Biden vote pek ai timmi lakin minung 10 lakah 9 tluk hi cu amah vote pek dingin an i fiang ngaingai i, Trump vote pek ai timmi lakin minung 10 lakah 8 tluk hi amah vote pek dingin an i fiang cang hna. Biden vote pek dingin ai timmi lakin 10 lakah 1 lawng hi lungawtawm deuh in a ummi a si i, Trump vote pek dingin ai timmi lakin 10 lakah 2 hrawng hi lungawtawm in a ummi an si ve.

Nov. 3 presidential election ni i national popular vote hmuh khawhnak dingah Biden hi a ningcang a tha. Asinain, a tangmi 9% voters pawl hi Rep. le Dem. karlak ah a zeideuh thim ding ai fiang rih lo mi a si ve rih. Hi hna biachahnak nih hin ahonih dah buan a co lai, timi lai a rel te lai.

National popular vote ah buan co ruangah election hi tei a si theng lem lo. Election hi cu state-by-state Electoral College system nih lai a relbik. 2016 lio zongah khan Trump nih popular vote kha a sung ko nain, buan a co thiamthiam ko.

Tu kum chung nihin tiangah cun Trump nih Biden a mei lei lawngah ai zii ko. Cu tikah, nai hrawnghrang in cun Floyd thah a ton hnu in a cangmi miphun thleidannak ruang i ram chung buaibainak vialte hi a vun i hmaithlak ve cang. American nih hin zeidang vialte nak in himnak le thatein zohkhenhmi si hi kan duhbikmi a si. “Nunphung kong Khuate an Chunmang” vialte a humhaktu ka si. tiin Trump nih amah le mah dirhmunsang ai pe.

Sualnak le ramchung buaibainak vialte ngamh ngaiin a dironh khotu president vote pek hi kan caah a biapibikmi cu a si, tiin khuate ah a ummi vunrang pawl lakin 11% lawng nih an chim. Sep. 9-10 karlak i poll an rak tuahmi ah khan cun, cu ti a chimtu vungrang pawl hi 13% tiang an rak phan bal. Sep. 3-8 i poll an tuahmi ah khan cun, 15% hmanh an rak si bal.

Hi kongkau pawl nakin, American mipi vialte bangin, khuate um vunrang pawl nih an lungre a theihpi bikmi cu American mipi 195,000 lenglo a thattu coronavirus kong hi a si.

Vote pek dingin zei nih dah na thinlung an
lakbik hna, tiin mipi an hal hna tikah, virus hi zeitindah tawlrel a si lai, timi kongah 27% an si i, American cozah ah ahonih hin dah khat le khat i zumhtonhnak hi a ser khawh lai, timi kongah 25% an si i, economy le jobs a thawntertu hi ahodah a si lai, timi kongah 19% an si hna.

Trump nih a minthatnak a hmuhnakbik economic growth a tuahmi cu cawngia (advertise) tuah a timh i, cu ti tuahnak dingah cun $10 million hman ai tim.

US economy hi ahonih dah a remh khawhdeuh lai, timi kongah 45% nih Trump an zumh deuh i, 36% nih Biden an zumh deuh ve.

Buaktlakin chim a si ah cun, tutan president thimnak kongah mipi nih an i hmaithlakbikmi tlangtar pahnih an um: No.1 cu coronavirus kong a si i, No.2 cu cozah lakah zeitindah khat le khat i zumhtonhnak tharchuah than a si lai, timi an si.

Reuters/Ipsos poll in online in US pumpi ah English holh in tuah a si. American mi lakin vote pek dawhdang a si bikmi minung 859 telhchih in, puitling lawngte minung 1,358 sinin an lakmi thawngpang a si. Tutan poll a dikcahnak tah tikah 4% points tlukin zumhraih awk a tlakmi a si.

Chelsea Bawi

Be the first to comment

Leave a Reply

Your email address will not be published.


*