Tuanbia Chungah a Chiakhabik mi President (By Chelsea Bawi)

Tuanbia Chungah a Chiakhabik mi President

=====================================

(America catial thiam minthang taktak Max Boot nih Trump a hmuh ning a tialmi hi rak rel cio hmanh u Laica tein leh piak nan si)

A tutiang zongah hin, Donal Trump hi US tuanbia chungah a chiakhabik mi President a si tiin, vun chim hi kai harh ngai ko. Tuanbia kong a thei ngaimi ka si bangin, minung pakhat a umtuning kan ngiatthlai tikah caan lak a hau, ti cu ka theih ko. A president hawi a si mi Harry S. Truman, asiloah zapi nih uartuk lo mi Dwight D. Eisenhower, George H. W. Bush pawl hmanh hi Trump nakin cun an i ningdeuh suaumau. Thomas Jefferson le Woodrow Wilson hei ti bantuk pawl hi cu cuhlan an sining tlukin an tha lem lo.

President Trump hi chanthar president vialte lakah a chiakhabik mi a si, tiin March 12 ah khan ka rak tial bal cang. Amahbelte cu, chan vialte chungah, tiin ka tial lem lo. A ruang cu, hi ka tial lio ah hin cun, James Buchanan, Andrew Johnson, Franklin Pierce, Warren Harding, asiloah zeihuaha a si lo mi hna nak in cun Trump hi ai ningdeuh ko rua, tiin ka rak ruah caah a si. Asinain, a liamcia thla khat chung i Trump a cawlcanghnak kan hun zoh than tikah cun, “Chanthar” timi biafang kha hmanpiak awkah ai tlak than ti lo. Coronavirus ningcalo tuk in a tawlrel caah, US tuanbia chungah a chiakhabik mi President ah amah le mah a hun i canter.

President Buchanan hi Civil War mei a kautu a si caah, Trump nakin a zualhma deuh khi a lo. Cu Civil War cu US tuanbia chungah tih a nungbikmi buainak a si. Buchannan hi san a tlailo bikmi President a si peng ko rih men lai. Asinain, Civil War cu a rauhhlan ah a dih ko lai, ti ruahchannak a rak um peng. Asinain, nihin kan tonmi kokek puicimhnak nih a chuahpimi zatlaknak hi cu hrial awk thalo dirhmun kan phan.

Kan tonmi thil hi tih a nuntuk caah, thluak in tuaktan khawh lo khi a si cang. Great Reccession 2007-2009 lio ah khan 9 million rian sungh a rak si. Tutan pulrai nih cun zarhkar hnih chung lawng hmanh ah riantuan kho lo in minung 10 million a chiah cang hna, tiah Atlantic nih a chim.

A tu lio unemployment dirhmun hi 13% a phan cang i, a liamcia kum 80 lio i a dih cangmi the Great Depression lio nak khan a zualhma deuh cang, the NY Times nih a chim. Cunakin a zualhmadeuh rihmi cu minung kan thihmi hi a si. Hi virus hi zero tiangah kan thumh chom lai, tiin Feb. 26 ah khan Trump nih a chim bal. A tu vial ah cun, virus nih hin minung 100,000 in 200,000 tiang a kan thah a si ah cun (cucu 1945 hnu i US nih kan tonmi raltunak vialte i a thimi nakin an tamdeuh tinak a si), kan tawlrel khawhnak ah a cang lai, tiin a ti cang.

Cu tin a si lai lo. Coronavirus hi US tuanbia chungah a tih a nungbik rai a si caah, Trump cu sungh lawng ai ba ko cang lai. Pearl Harbor le 9/11 he ti bantuk tham kha cu thil a can hnu lawngah, nehhnu cang ti lo dingin ralrinnak hun suaisam lawng a ngahmi thil a si. Asinain, tutan virus kongah cun zeidah a cang, tiin top-secret intelligence pawl an ruahnak hal hrimhrim a herh tung lo. Mithiamsang pawl nih media hmangin January tein khan pei ralrinpeknak an tuah ko cang cu. Cun Joe Biden telhchih in Democrats pawl nih ralrinpeknak an chim diam cang.

Cun cozah officials pawl zong nih cubantuk ralrinpeknak thawngpang cu Trump sinah direct in an kuat ko. January 3 i China ah a tlungmi virus kong hi Trump cozah sinah thanh a si ko cang. A rauhhlan ni tlawmpal ah khin US spy agencies pawl zong nih hi virus tih a nung ning kong Trump sinah thawng an thanh colh ve ko. Asinain Trump nih an bia a ngaihpiak duh hna lo, tiah the Post nih a chim.

Thlichia hrang dingin ai timhtuah lio ah Trump nih zeihmanh a tuah duh lo, tiin ca in a tialbiktu phu hi the Post an si. January 18 ah khan Health and Human Services Secretary Alex Azar hi virus kongah Trump bia vung ruah hmasabiktu a si. Trump nih hin mi thin a lautertu bantuk men ah a ka ruah. Cucaah, hi kongah a thinlung ka la kho lo, tiin mitampi sinah Azar nih a chim. Virus kongah January 22 ah khan Trump cu bia na hal i, “Kan tawlrel khawh dih cang. China in a ra tlungmi minung pakhat lawng nih a zawmi a si” tiin a leh sa lam hna.

Azar nih cun Trump cu virus kongah ralrin a pek hi a zarhzarh a rau cang. Cu bu zongah cun, meeing 8 a ngei, golf voi 6 a tu. Zeicahtiah vawleipi hi a zawn a ruat fam lo cu ta.

Trump a daithlannak nih hin mipi lung an kan vaivonh dih i, mithiamsang pawl he ralchanh in a um cang. Virus kongah cozah pi hmanh hi a khual a hnumhter dih. Abikin, thawdawpnak, a herhmi hriamnaam le sii le ai kongah, cun test tuahnak kongah an daithlang ngaingai.

Taiwan, Singapore, Canada, South Korea, Georgia le Germany hei ti bantuk ram pawl hmanh hi US nakin an i ningdeuh tuk. Cu ruangah a thi zong an tlawmdeuh nak hi a si. South Korea le US hi an ram i zawtnak an hmuh hmasabik a ni ai khat bak. South Korea ah minung 183 an thi, cucu 1 million ah 4 an thi, tinak a si. US ah cun 1 million 25 an thi. South Korea nakin a let 6 in kan thi deuh. Cun virus a karh zong a rangtuk fawn.

Tutan virus hi a zualhmattuk caah, George W. Bush le Jimmy Carter hna takchunhnak ah lak hau an hun si phah. Ukraine kong i Trump a sining a phuangtu intelligence community inspector general cu a rian in Trump nih a phuah. Cucaah, a lungput zoh tikah, George W. Bush asiloah Carter siseh, cun Richard Nixon i eihmuar a hmanmi he hun thahchunh hau khin a um cang.

Trump hi midang thangchiat a huambikmi a si. China, media, governors, Obama, Democrats lei in taza a cuaitu managers pawl cu a soi dih hna. A soisel lo mi cu golf a tuktimi, asiloah a bawmtu lawnglawng an si. Hi kongah tuanvo pakhat hmanh ka ngei lo, tiin a ti sa lam. Cu biasolhphelhnak a tuahmi nih cun vote a petu tlungthin ah zeitin dek bia a chim te lai. November ah zei khom va cang kun ai kaw, tuanbia chung i a sining cuaithlai a si mi hi cu a hrial kho te lai lo. Cuhlan i US president vialte lakah a chiakhabik, tiin theihmi James Buchanan cu a hun mirhzuk ko cang lai hih.

Chelsea Bawi tialmi lak chin mi a si.