A poi ko: Hrokhrawl Ruangah Trump hi Hlathlai a Tong Kho Men

Hrokhrawl Ruangah Trump hi Hlathlai a Tong Kho Men
======================================

President le a chawlehthalnak hlathlai dingin Manhattan district attorney, NY, nih khuakhannak a ngei. Cu ti khuakhaan cu a um bal theng lo mi a si. Trump nih tax return a hmuhmi kong kum 1 chung hlathlainak buaipi cangmi Manhattan district attorney’s office nih Monday in khan Trump kong hlathlainak dingah a fekmi dirhmun kai hmuh cang, tiah a chim.

Attorney Cryrus R. Vance Jr. nih tax kongkau i Trump a hrokhrawlnak hlathlainak a tuah hi kum 2 a si cang ko nain, tutan ceu ah hin officially tein a kong hlathlainak tuah dingin capar a tin hi a si.

A new court filing from the Manhattan district attorney offered rare insight into the office’s investigation of the president and his businesses.

Mr. Vance hi Democrat a si i, cuhlan ko ah cun a office nih thatlonak a hlathlaimi kong hi zapi theih in a thanh bal theng lo, a thuhnawh deuh tawn. President i kum 8 chung a tax return kong August 2019 i a office nih nawl a chuah mi nih a tu bantuk i hlathlainak tuah ding i a karhlannak hi nikhua a tlaiter dih.

A tu bantukin Mr. Vance nih nawl a chuahmi hi kham hrimhrim a hau, hihi cu puarthautuk bia le politic lei kap in karhlannak a tuah bantuk a si, tiah Trump i a sihni pawl nih an chim. Trump a pumpak kongkau siseh, cun a business asiloah ai palhmi a tuahsernak he pehtlaihnak a ngeitu vialte hna hi direct in an sual ka kawl bia a si lo, tiah Mr Vance nih fim ngaiin a leh hna. Cu tikah, Trump kong a hlathlainak rian hi a dikdiar in mipi sinah a thanh duh lo.

Asinain, Trump le a business hna nih ningcanglo in cawlcanghnak an tuah, timi kong cu news nih siseh, mipi nih siseh an chimceih ngai cang, tiah taza a cuaitu lei nih an langhter. Cu ti news le mipi nih an chimceihmi vialte hna cu tax le insurance kong i rutreu phun i a tuahsernak siseh, cun a business record pawl lihfangfak in a langhtermi vialte hna a fehtertu an si i, cu vialte a sualpalhnak hlathlainak dingah tehte bantuk an si, tiah taza a cuaitu lei nih an chim. Trump kong hlathlainak tuah an timhnak a ruang tampi lakah, tax kongkau i rutreunak a tuahmi hi a pakhatnak si dawh a si.

A kongkau hlathlainak tuah dingin mipi nih an duhnak an langhtermi vial lawng attorney office nih tehte ah ai hman ah cun a kong thlathlainak dingah nawlchuah khawhnak lam ai ngeih, tiah taza a cuaitu nih an chim.

Attorney nih Trump kong hlathlai dingin capar a tinmi kongah Trump i a sihni Jay Sekulow nih zeibia hmanh a let rih hna lo.

A tu bantukin in nawl an chuahmi hi Supreme Court ah ceih siseh law ka duh, tiah Trump nih saduh a that. Hihi zawndamh rumro in mi sual an kan kawl a si i, tuanbia chungah a chiakhabik mi mi sual kawlnak a si, tiah Trump nih kan hnung thla ah khan a chim bal.

Tax return a haltu Trump i a accounting firm le phaisa cazin kong hlathlai dingin Mr Vance minung pawl nih nawl an chuah ruangah a tu bantukin buabainak ai thok hi a si.

Trump he kan itti bal, tiin a titu nunau 2 kut ah phaisa a tomtom in an ka phihnak an tuahmi kong zong Mr Vance’s office nih a hlathlainak a sau cang.

Nai le bang khan cu a kong an hlathlainak lohma an kauh chinchin cang i, chawva lei a buarsomi le insurance kong i rutreu phun ai lakmi vialte zong hlathlai chih dingin an i tim cang. Cun, Trump i a cazin zong hi kan i hmaithlakmi ah ai tel, tiin an chim.

Cu ti a kong hlathlai dingin nawl an chuah le cangka, Trump nih an nawl chuahmi kham dingin federal ah taza a cuai ve colh hna i, President a tuan lio mi ka si caah, ka sual kawl khawh lo nak babucawng ai vurhmi ka si, tiin a ti hna. Cu ti a chimmi cu Manhattan i Federal District Court ah a tu mi biaceihbawi Victor Marrero nih a hnonpiak colh.

Khat le khat an i alhnialnak cu Supreme Court tiang a phan taktak cang i, Trump ralchanh in biachahnak an tuahmi cu July ah khan a hnonpiak hna.

President a va si ko hmanh ah, zeibantuk citizen hmanh hi sualpalh ruang i taza cuai a si tikah, tehte langhter hau lo mi hohmanh an um lo, tiin Chief Justice John G. Roberts Jr. nih majority caah a tial.

Trump hi lower court ah vung kal in a kong hlathlai ding i nawl an chuahmi ralchanhnak vung tuah kho a si thiamthiam, tiah justice nih an chim. Trump kong hlathlai dingin nawl an chuahmi hi politic muisam a keng, cucaah hihi cu tonghmang lo in cio thlak ai timmi ko an lo, tiin Trump a sihni pawl nih Judge Marrero sinah an chim.

Trump kong kan hlathlainak caan hi a rauhtuk sual ah cun, “Trump hi hi kongah an sengnak a um lo” tiin Supreme Court nih an ti bangin khan, a sualpalhnak vialte nih tlunh (a cungah riantuan khawh lo) a fawite mi a si, tiin August ah khan Judge Marrero nih a chim.

Tutan thilsining i a chungmuru kan zoh tikah, Trump hi a sual kawl khawhlo nak ding lam a tam ngaingai. Justice lei nih hin hi buaibainak hi donghter an duhtuk cang, tiah Marrero nih a chim.

US Court of Appeals for the Second Circuit ah cu bang i biachahnak tuahpiak dingin Trump nih nawlnak a tuah lio pi a si. Marrero i a khuaruahnak hi a hramthok in a dongh tiangh ai palhmi a si, tiah Trump i a sihni pawl nih an chim. Trump hi i manh lo ngaiin um seh, ti a duh bia a si, tiin ah chim.

Taza cuai khawh lo a si nak a ruang a dotdot pawl Trump nih vun nunter than ai timh bia a si lo. District level in a kong hlathlai dingin nawl an chuahmi a ruang set te hi a dironh (challenge) caah a si, tiin a sinih pawl nih an tial.

Friday ah khin biakaa in chimtonhnak ngei dingin appeals court nih nithla an tuk hna. Asinain, kaphnih lei in an biahla pawl hi Supreme Court ah lanhter khawhnak nawl an i ngeih veve, tiah baiceihzung nih nawl an chuah. Cu ti a si ah cun, Nov. 3 hlan ah cun an bia hi ceih khawh dawhdang cu a si ruam lo.

Mr Vance i a minung pawl nih Trump i a tax record hi a dikdir in an kut ah an i ken cang ko hmanh ah, mipi theih taimai in cun fawibai in langhter dawhdang cu a si rua lo. Mr Vance’s office nih Trump taza an cuainak biaceihzung i an chuahpi tik i a tax return kong hi biapihla ah a can sual belte le, zapi theih in thanh a si chom te ding khi a si.(Chelsea Bawi)

Be the first to comment

Leave a Reply

Your email address will not be published.


*