Firmi Khrihfa Hngakchianu Muslim Pa he Umhter an Timhmi cu Pakistan Biaceihzung nih a Hnonpiak Hna

Firmi Khrihfa Hngakchianu Muslim Pa he Umhter an Timhmi cu Pakistan Biaceihzung nih a Hnonpiak Hna
================================================================================

Kum 13 te lawnga si rih mi Khrihfa nute Arzoo Raja le kum 44 a si cangmi Muslim pa Azhar Ali he umhter an timhmi cu Pakistan high court nih a hnonpiak hna. “I umh khawh a si ko” tiin tuan i biaceihzung pakhat nih biachahnak hrawh in high court nih a tu bantukin biachahnak thar a tuah hi a si.

Oct. 13 ah khan Azhar nih Raja hi a inn a um lio ah a fir i, a thit (nupi ah ai tuah). “Lungthotein Islam ah a ka lut cang i, Azhar zong ka vaat ko cang,” tiin Raja nih capar cungah min thutnenh tein a chim. Cu a chimmi kong cu International Christian Concern’s South Asia Regional Manager, Will Stark, nih The Christian Post ah a chim. Raja nih cu ti minthutnenh tein ca a tialnak a ruang hi hrocer le, hranhram in sualpi le hrem a ton caah a si lai, tiah zumh a si.

A hmasa biaceihnak zung nih bia an chahmi hrawhpiak than a si hnu cun, the Sindh High Courth ah a ummi siailei thiamsang phu nih Raja a sining an zohfel tikah kum 14 hmanh a tlin rih lo kha an theih, tiah International Christian Concern nih a chim.

“Raja a case hi a hmanmi lam cungah a phan ko cang. Kum tlinglo a sinak kong zong kan thlircawipiak cang. Raja hi kum tlinglo a si. Cucaah the Sindh Child Marriage Restrain Act (Hngakchia Thitumhternak Phung) ning zongah Azhar he thitumhter hi a dik lo, a ruang a um lo, cun phung he zong ai kalh,” tiin Stark nih a chim.

Phung nan buar, tiin Azhar siseh, anmah lung tein an i thitumh lio i min a thutpiaktu Muslim riantuantu pakhat zong cu Police nih an tlaih cang hna, tiah ICC nih a chim. A tu hi Raja cu mihar zohkhenhnak inn ah Raja cu cozah nih an chiah lio pi a si.

The Sindh Child Marriage Restraint Act phung tangah hin Pakistan ram Sindh pengkulh chung i a ummi nih cun kum 18 tang hngakchia thitumhnak tuah hi phung hei ai kalh ah a chiah. Raja i a case kongah hin, kum tlinglo thitumhnak an buar lawng hmanh khi a si lo, tiah Stark nih a chim.

Islam ah ka lut cang, tiin Raja nih min a thut cang caah, hringtu a nu le a pa sinah biaceih zung nih an kirter duh ti lo. Pakistan ah hin, Khrihfa nu le pa nih Muslim fa an cawmkeng duh lo. Muslim pawl zong hi secular law nakin anmah Islamic law ning tu in an biaceihpiak deuh a si tawn.

Raja a chungkhar hi Catholic an si i, cu ti Islam a luhmi kongah cun Karachi ah a ummi Catholic Archdiocese nih tazacuainak a tuah, tiah the Union of Catholic Asian News nih a chim. Pakistan law (upadi) ningah cun, kum 18 a tling cang mi lawng Islam ah i thlen khawh a si, ti a si. Cucaah, Islam lei i thlennak kong i law (upadi) hi vun kan zulhpiak hram ko u, tiin Archdiocese nih cun biaceihzung a nawl hna.

“Phungning tein hi kong hi kan doh a hau. Khrihfabu le international law ningah, kum tlinglo minung pakhat bianak ai thlen khawh lai ka zumh lo. Pakistan ah hin, kum 18 tang hngakchia paoh nih cun nu le pa nih an i ngeihmi zumhnak an zul cio ko hna,” tiin, diocesan director of the National Commission for Justice and Peace le vicar general of the Archdiocese of Karachi, Father Saleh Diego nih a chim.

Raja nih min a thutmi biaknak i thlennak capar zong nih hin ngakchia thitumhternak case he pehtlaiin thil buai pakhat a chuahter mi a um. Pakistan nih hin biaceihzung kipah secular law le Islamic law a hmanti hna. Islamic law ningah cun, avoikhatnak nuphung a thei cangmi nu paoh cu thit khawh an si, ti a si. Cucaah, Raja hi Muslim a luh cang caah, kum 14 hmanh tling thitha hlah sehlaw, thit khawh a si cang, tiah biaceihzung nih biachahnak a tuah khawhmi a si. Cu ti cun bia cu a chat lem lai lo nain, chah khawh zong a si ve thiam rih, tiah Stark nih a chim.

“Hi kongah kirhnawh than khawhmi pakhat tal kan i ngeih kho lai maw? Ngeih kho e. Biaknak ai thlennak hi biaceihzung nih phungning te a si ko, a ti sual ah cun, a konglam hi civil biaceihzung in Sharia baiceihzung lei ah thial a si te lai. Asinain, cu ti i biaknak ai thlennak cohlanpiak a si lai le si lai lo belte cu theihfian khawh a si rih lo,” tiin Stark nih a chim.

Ngakchia thitumhnak Raja cungah an tluntermi ralchanh in Pakistan’s Minister for Human Rights le Sindh Province governor nih bia an chim ve cang. Cucaah, a konglam Sharia biaceihzung chuahpi dingin a khupthal an lehpiak ngam lai cu zumh a si lem lo.

Ka fapa sinah ka kirter than ko u. Keimah lungtho tein ka vaatmi a si ko, tiah Raja nih biaceihzungah a chim. Cun Islam luh zonghi keimah lungtho tein ka tuahmi a si ko, tiah a chim. Cu kong cu ICC nih a langhter.

Raja kong bantuk ah hin, biaceihzung an chuah tikah an konglam lih in chim dingin nu a firtu pawl nih hin an firmi nunau pawl hi an thihphaih zungzal hna, ti a si. Kaa ang ngam lo dingin thalo in nuvasualnak an tuahpi hna i, ningzah an thlaih tawn hna. Cun, cozah nih an sakmi mihar chiahnak inn lila zongah hin Raja hi hrocer tong zong sehlaw theih lo a si. Cu bantuk innlo tangah a phanmi paoh hi hranhram lo in Islam luh an fial tawn hna, ti a si. Cu bantuk buainak tampi cu a um ko nain, Raja case tu hi cu buaktlak in zoh tikah ruahchannak a um ngai ko.

“Asinain, a case hi ruahlopiin ai sining ai thleng kho a si peng rihmi hi ka khuaruah a ka harter ngaingai. A cunglei i politician minthang pahnih (governor le minister) hi palh ah an chiah sual hna ah cun, a case hi phundang piin merhpiak a si kho rih mi a si. Hi kong he pehtlaiin an ram nih an i ngeihmi politics zoh tikah belte ah cun i thlen dawhdang cu a si in ka hmu ti lo,” tiah Stark nih a chim.

Chelsea Bawi

Be the first to comment

Leave a Reply

Your email address will not be published.


*