Qasem Soleimani cu Drone hmang in an thanhnak kong he pehtlai in President Trump tlaihnak ding nawl Iran nih a chuah.

Qasem Soleimani cu Drone hmang in an thanhnak kong he pehtlai in President Trump tlaihnak ding nawl Iran nih a chuah.
===========================================
2020 January lio ah drone hmang in Iran ralbawi an rak thahmi kong he pehtlai in Iran nih US President Trump cu tlaih ding in nawlchuah asi tiah Fars news agency sin in Cacawn nikhat ni ah khan theih asi.

Trump cu Islamic Revolutin Guard Corps (IRGC) luzik asi mi Qasem Soleimani athihnak he pehtlai in Iran nih tlaih ding nawl chuahmi minung 36 lak ah pakhat asi ve tiah Fars new in theih asi. Tehran Attorney General Ali Alqasi Mehr chimnak ah cun Trump hi cunglei bik cazin ah chiah asi tiah ati.

Mehr nih cun Trump cu president a ṭuan caan a dih le cangka in tazacuai aa huah lai tiah Fars news sin ah a chim. Cu leng ah hi minung 36 he pehtlai in Red Notice timi chuah piak dingin Interpol sin zong ah nawl hal asi cang tiah ISNA news nih a ṭial, asinain Interpol lei nih cun nawl chuahpiak dawh cu a lo lo.

Interpol lei nih cun “hi sining ah nawl hal mi cu ruah piak asi lai lo” tiah CNN news sin ah an ti. Interpol zauk phung le phung hrampi ah “bu sining in ramkhel kong ah siseh, ralkap kong ah siseh, biaknak kong ah siseh, miphun sining thleidannak he pehtlai in siseh i thlak lo ding” tiah aum caah asi.

Brain Hook, US special representative for Iran nih cun “ramkhel kong ah mi hlei cuang duhnak le mipi lunglak duh bia asi” tiah Adel al-Jubeir, Saudi Minister of State for Foreign Affairs he tuah mi thawngthanhnak ah cun a chim. “Hihi cu kan tuah kel, mipi lak ah thawngzamh le laar duh bia si. Ram humhimnak, vawlei ramkip himnak le ningcang tein umnak ding caah asi, hi caah zeihlei tuah ding aum lo. Mah laar duh le ramkhel ah cuang duh sawh bia si, mizei hmanh nih hihi biapi ah an chiah lai lo leng ah Iran tu kha mihrut an lo lai” tiah Hook nih cun ati.

Soleimani cu US nih drone hmang in Baghdah International Airport ah January thal ah adang a zultu panga he thanh an rak si. Cu lak ah cun Iran nih dirkamh mi Iraqi Popular Mobilization Forces (PMF) luzik changtu Abu Mahdi al-Muhandis zong aa tel ve. Atu bantuk tuahserhnak cu Iran le a ramhawi pawl nih sual an phawt i “mithat lainawng rian” tiah an ti i hmailei caah zong ah ṭihphannak a chuah ter tiah an ti.

Iran lei biaceihnak lei chimrel nawl ngeitu, Gholam-Hossein Esmaili nih cun ramdang ngiathlai tu bu pawl he rianṭuan ṭi tiah biacheih asi mi pawl cu thih dan pek an si” June thla thok ah khan a rak chim. Seyed Mahmoud Mousavi Majd nih Soleimani kong he pehtlai in US ngiathlai tub u pawl sin ah chimphuannak a tuah tiah a chim chap.

President Trump uknak lei nih an hmuh ning ah cun Soleimani cu mithat lainawng asi tiah an hmuh. Cun hikong hi, khahlan cozah hmanh nih an rak tuah ding asi cang tiah President nih thawnglatu pawl sin ah January thal ah khan a rak chim bal. Pentagon nih Soleimani cu Americans mipi za leng le ram hawi mipi pawl caan saupi chung an rak thihnak he pehtlai in mawhchiatnak a tuah. “General Soleimani nih American cozah rianṭuantu pawl ningcang tein a thah khonak ding timh ciammam tein a rak tuah” tiah Pentagon lei nih an rak chim. Cu caah hmailei ah hi bantuk Iran rammi pawl nih ralnak an ngeih lo ding timi fiangfai tein humhimnak caah kan tuah mi asi tiah an rak ti.

Ref: CNN

Be the first to comment

Leave a Reply

Your email address will not be published.


*