SUPREME Court Justice Ruth B Ginsburg Sizung Phan

Biahmaithi
***********
Tu thla chung cu online ka cacawn mi nih a ka nenh caah zei thawngpang hmanh ka tial kho lo. Zahan zan ah second course ka laakmi exam ka tuah dih I, assignment tialmi, ka kuat dih caah tu zanlei ah thawngpang tlawmpal te kan dangh hna.

SUPREME Court Justice Ruth B Ginsburg Sizung Phan
*********************************************
Kum 87 renglo a si cangmi, Supreme court Justice Ruth Bader Ginsburg cu cancer zawtnak in sizung a phan than. Asinain Suprem Court in ttum ka tim rih lo” tiah statement a chuah. June 19 in Chemotherapy an thawk lai. June 13 khan a taklin, a khuasih caah Maryland Baltimore i Johns Hopkins sizung ah an tlikpi. A rian aphuah sual ahcun President Trump le conservative caah thawngtha taktak a si lai. 1993 ah President hlun Bill Clinton nih Supreme court ah rian a rak pekmi a si. Suprem court Justice vialte lak ah liberal ruahnak a hrim bikmi a si an ti. Suprem court biaceih bawi cu thih hlan lo, an tuan khawh chung tuan a si. President nih rian apek nain Presdient lila nih nih aphuak kho ti hna lo, cucaah supreme court biaceih bawi thutdan cu President thim tluk tein a biapi. An thim cangmi hna cu a tlawm bik, kum 30 in kum 40 tiang a nguh caah liberal le conservative president thimmi hna nih anmah ruahnak a pommi, biaceihbawi rian pek an I zuam.

Corona Virus A Karh
*****************
Corona Virus cu vawlei pumpi a cul dih hnu ah a voi 2nak, second wave nih cul than a timh tiah an ruah. US ah cun California, Florida, Geogia, South Carolina le Taxes ah biatak tein a karh. Philipine, Australia, India, Spain, Portugal, UK, Germany, Hongkong le China khualipi Beijing ah a khar than ti a si. US ah 3.6 million zawtnak ngei balmi an si. Zawtnak in minung 138753 an thi cang. A dam thanmi million pakhat renglo an si. Virus test a tuahmi 48 millions an si.

Covic-19 Vaccine mRNA-1273
**********************
Coronavirs ikhamhnak sii, cu serchuah dingah company 40 renglo nih an I zuam cuahmah lio a si. Mah hna lak ah hmaisuang in hnisaknak a tuah khomi cu Moderna Inc nih an serhmi mRNA-1273 a si.

Moderna le National Instutitue of Allergy and infectious Disease an I bawm I, minung 45 cu thla 4 chung an hnisak hna hnu ah side affect a um lo caah thawngpang tha ngaingai a si. Kum 55 in a chunglei minung pawl an hnisak rih hna lai I, zeihmanh a hnursuan mi a um lo ahcun kum khat ah billion pakhat renglo kan chuah khawh lai tiah an chim.

President Thimnak Poll Zumh Awk Tlak Maw?
**********************************
US President thimnak poll a phunphun a chuak. Joe Biden cu teinak an coter peng. Asinain 2016 bantuk a chuak kho thiamthiam tiah an ruah. Zeicatiah 2016 lio ah Hillary Clinton cu opinion poll ah teinak a coter peng, asinain thimnak result taktak a chuah tik ahcun Donald Trump nih a tei diam. Tukum thimnak zong hi 2016 bantuk a si kho. Zeicatiah holh loin dai tein a ummi, Silent Majority” pawl nih zei bia hmanh an chim duh rih lo. Thimfung thlak ni taktak ah an duhmi candidate cu thimfung an bungh hnawh lai I, teinak a co lai tiah an zumh.

Bawi Jesuh Cu Lesbian Bantuk Ah An Ruah
**********************************
Liberal state tiah a minthang bikmi state cu California le New York an si. Cu hmanh ah California hi a minthang khun. California cu liberal pawl an ruhnak le an chahnak hmun a si lawng si loin Pathian zei ah a rel lomi, Hollywood pawl nih hmunhma a khuarnak hmun a si. Hollywood nih Habit timi movie pakhat thlak an timh I, Bawi Jesuh cu lesbian timi, nule nu aa duhmi ah canter an timh. Bawi Jesuh lemcang a tuan dingmi fidi cu Michael Jackson fanu, Paris Jackson a si lai an ti. Mah movie thlak dingmi cu khrihfa pawl an thin a phawh hna caah signature campaign an tuah I, movie thlak lo dingah minung 300,000 nih minsen an thut cang. Hollywood pawl nih hin Pathian zei rel lonak movie an thlak pah lengmang.

Federal Unemployment Benefits $600
*******************************************
Coronavirus zawtnak ruangah rian an dinhter mi hna le rian phuah a tongmi hna cu Federal cozah nih state cozah pekmi unemployment benefit phaisa pin ah zarh khat ah dollor $600 pek chap a si. Mah pekmi cu cozah nih an pehzulh than lo ahcun July 25 ah hin a dih ding a si cang. Secretary of Treasury Steven Mnuchin nih a chimnak ahcun mah bawhnak hi kan dihter ah a tha deuh lai tiah a chim. Zeiruang tiah cun federal nih pekmi $600 pin ah state cozah nih pekmi he a fonh ahcun full time rian an ruanmi nak tam deuh a hmumi an tampi caah a si. Mah pek chapmi donghter lo ahcun rian an lut duh than ti lai lo” ti an phan caah atu bantuk in donghter an timh cu si.

Salai Lai Ram Thang

Be the first to comment

Leave a Reply

Your email address will not be published.


*