USA President Trump An Huatnak Nihhin Pathian Duhdawtnak A Ka Ruatter

USA President Trump An Heeknak Ihsin Pathian Duhdawtnak Ka Ruat
~~~~~~~~~~~~~~~~~~~~
Salai V Bawi Lian

Bible Reference:
Rom – 3, 5, Efesa 2, Hebru 4:14

Zarhkhat sung zantin deuh thaw in USA mifim filor pawl ih lairelnak; an rampi president heektu pawl ih puhnak le humtu pawl ih thulehsnak pawl cu LIVE in ka zoh man caancaan ah ka zoh phah ih a caan le an thlah zo mi pawl zohsalnak neiin caan ziang maw tizat ka hmang. An fim zia le an rampi daan pawl an theih zia, an ṭuanvo le tuah ding mi pawl an theih zia cu an ṭongkam hman mi pawl ihsin theihthei a si.

Kum ziangmaw tizat mai phur zawng leitlun thuthang ngaihven ṭheutu ti cu, ka Facebook ih newsfeed pawl khalah thuthang ka ret mi pahnihkhat pawl an rak um ih cumi lakih thupibik tiih ka ruah mi an asi ruangah mit a la zet ih man awl caan ahcun ka siar in ka ngaihven ve ṭheu.

An thurel bikmi cu eiruknak thu ih puhnak bik asi. USA rampi President Trump in Ukraine ram president Volodymyr Zelensky hnenih minute 30 tluk an biakawknak sirhsan mi asi.

A biakawknak ih an thurel bikmi cu kum 2020 USA rampi President hrilawknak ih cuhtumtu Joe Biden ih fapa Ukraine ram ih a hnaṭuannak ah eiruknak a um maw timi Trump in Ukraine ram president pa hnenah a thuneihnak hmangin a sutter, daanlan in a thuneihnak a hmang tiih puh awknak asi. Hi tiih eiruknak a um le umlo an hliakhlai lo ahcun USA rampiih a pek dingmi sumpai $250 million man ralthuam thilri bawmnak pek ding mi khal pe hirhloin kan lo kaitang hrih ding tiin a ti tiih puhawknak a si.

An biakawknak hi reilote vek a bang nan thuhla dang pawl khal an kaikawh cih vivo ruangah meialh kangkai bangin a sosang phah zet. USA president Trump, a mai ṭuanpi rori tellin a dokalhtu mi 12 pawl in a sualnak hawlin an heek.

President Trump in USA rampi daankalh in eiruknak le thupthiarih cangvaihnak a nei timiih an puhnak ih A puhtu pawl an kamkaunak hrang catlang siarnak hi minute 45 asi. An puhnak thu pawl an siar thluh hnu ah, cumi sirhsan in thusuhnak le simfiang betnak, zohhliahfelnak an nei. Tu ni tiang ahcun Trump an puh mi ah sualnak fumfe zet ih simfiangnak a um hrihlo tihi mi tamzet ih hmuh dan le pom dan asi. Asinan President ihsin hlonding a sile silo thuhla botcatnak hi tuah a si hrihlo.

An heekawknak thuhla ka ngai rero laiah ka thinlung ah thuhla pakhat a ra suak dukdi. Nitin kan nunnak ah leitlun mi pawl le setan in, kan ni khal in heek rero asi timi ka ruat ngah. In heek dan cu a dang cio men ding. Asinan minute tin sekan tinin kan sualnak cu kan mah le mah ah ringzet in a auter ih, kan mah le mah rori rinsanawknak neinawn lo dingin in tuah ṭheu timi ka thilung ah a ra lut.

Cumi rualrual in kan Bawipa Jesuh Khrih ih in Duhdawtnak a thuuk zia le in zaangfahnak a maksak zia ka ruat sal tikah, kan Pathian hi ziangtluk lawman in so a maksak ti khal ka thinlung sungah a ra lut. Jesuh Khrih in kan sualnak pawl cu kan aiawh ah, in rel sak ih kan ni cu mi thianghlim le sualnak ngaidam mi ah kan cang asi timi ka hnathlam ah a ra.

Leitlun kan damsung ahcun kan rinsanbik le kan uarbikmi, an hrang ih kan ziangkim kan pek ngammi kan rualpi, kan unau, kan Kawhhranpi, pawl in in hnongin kan sualnak pawl hawl in, in hlon, in heek thei. Asinan kan sinak ngaingai asimi kan Bawipa Jesuh Khrih ruangih thiamconak a congahtu kan Sinak ngaingai cu zianghman ih thamtheih a rak silo timi thazaang thar ka ngah.

Trump heektu pawl ih Trump a silonak/sinak tlun ah USA rampi daankalh in hna na ṭuan tiih an heek vekin nitinin kan thlarau nun cauter dingin Bible le Pathian thu pawl lala tla hmangin kan lungawinak le kan sinak pawl cangvai ngamlo dingin in heek rero. Asinan cumi cu Jesuh Khrih ih duhdawtnak le tuahnak ruangah sualnak cun kan thlarau a neh theiloih Pathian mithmuh ah mifamkim tiih cohlan kan rak si.

USA president Trump cu a lalnak ihsin an rak hlon men tla a si thei. Asinan kan nicu Jesuh Khrih kan zum ih a dung kan thlun ahcun ziangvek thil khal thleng khal sehla kumkhaw nunnak le Vanram ih kan tokham ihsin zohman in inhnuk thla theilo asi. Kan rundamnak cu Amah in a kilkhawisak ih kan ni cu himte in in kil ih thazaang thar thawn nitin in thuam asi.#

(C-Ministry)